ದೇವ್ ದಾಸ್ ನ ಲೀಲಾ’ತುಳು ಚಿತ್ರಕ್ಕೆ ಪ್ರೇಕ್ಷಕರಿಂದ ಉತ್ತಮ ಸ್ಪಂದನೆಕಡಲತೀರದ ಸಿನಿ ರಂಗದಲ್ಲಿ ಹೊಸ ನಿರೀಕ್ಷೆ ಮೂಡಿಸಿದ ಮನರಂಜನಾ ಚಿತ್ರ

–ಪಬ್ಲಿಕ್ ಅಲರ್ಟ್ ನ್ಯೂಸ್:-ದೇವ್ ದಾಸ್ ನ ಲೀಲಾ’ತುಳು ಚಿತ್ರಕ್ಕೆ ಪ್ರೇಕ್ಷಕರಿಂದ ಉತ್ತಮ ಸ್ಪಂದನೆ ಕಡಲತೀರದ ಸಿನಿ ರಂಗದಲ್ಲಿ ಹೊಸ ನಿರೀಕ್ಷೆ ಮೂಡಿಸಿದ ಮನರಂಜನಾ ಚಿತ್ರ

ಮೈಸೂರು: ತುಳು ಚಿತ್ರರಂಗದ ಬಹು ನಿರೀಕ್ಷಿತ ಚಿತ್ರ ‘ದೇವ್ ದಾಸ್ ನ ಲೀಲಾ’ ಬಿಡುಗಡೆಯಾದ ಬಳಿಕ ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ಪಡೆದುಕೊಳ್ಳುತ್ತಿದ್ದು, ಇದೀಗ ತುಳು ಭಾಷಿಕರಿರುವ ವಿವಿಧ ಪ್ರದೇಶಗಳತ್ತ ತನ್ನ ಪಯಣ ಆರಂಭಿಸಿದೆ.

ಕಾಮಿಡಿ, ಭಾವನೆ, ಫ್ಯಾಂಟಸಿ ಹಾಗೂ ಆತ್ಮಶೋಧನೆಯ ಅಂಶಗಳನ್ನು ಒಳಗೊಂಡಿರುವ ಈ ಚಿತ್ರವು ಸಂಪೂರ್ಣ ಕುಟುಂಬ ಮನರಂಜನೆಯ ಕಥಾಹಂದರವನ್ನು ಹೊಂದಿದೆ. ಏಪ್ರಿಲ್ ೨೪ರಂದು ಮಂಗಳೂರಿನಲ್ಲಿ ಬಿಡುಗಡೆಯಾದ ಚಿತ್ರಕ್ಕೆ ಪ್ರೇಕ್ಷಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದು, ಕರಾವಳಿ ಭಾಗದ ತುಳು ಸಿನಿ ಪ್ರೇಮಿಗಳಲ್ಲಿ ಹೊಸ ಉತ್ಸಾಹ ಮೂಡಿಸಿದೆ.

ಕಥಾ ಹಂದರ:
ದೇವ್, ದಾಸ್ ಮತ್ತು ಲೀಲಾ ತಮ್ಮದೇ ಆದ ಜೀವನದ ಸಮಸ್ಯೆಗಳಲ್ಲಿ ಸಿಲುಕಿಕೊಂಡು, ತಮ್ಮ ಸಂಕಷ್ಟಗಳಿಗೆ ದೇವರನ್ನೇ ಹೊಣೆ ಮಾಡುತ್ತಿರುತ್ತಾರೆ. ಈ ಸಂದರ್ಭದಲ್ಲಿ ಮಹೇಶ್ ಮತ್ತು ಮಹಾಬಲ ಎಂಬ ಇಬ್ಬರು ನಿಗೂಢ ವ್ಯಕ್ತಿಗಳು ಇವರ ಜೀವನದಲ್ಲಿ ಪ್ರವೇಶಿಸಿ ವಿಭಿನ್ನವಾದ ಸವಾಲೊಂದನ್ನು ನೀಡುತ್ತಾರೆ. ತಮ್ಮ ಸಮಸ್ಯೆಗಳನ್ನು ಪರಿಹರಿಸುವ ಬದಲು ಬೇರೆಯವರ ಸಮಸ್ಯೆಗಳನ್ನು ಪರಿಹರಿಸುವಂತೆ ಅವರಿಗೆ ಸವಾಲು ಹಾಕುತ್ತಾರೆ.

ಈ ಪ್ರಯಾಣದಲ್ಲಿ ದೇವ್, ದಾಸ್ ಮತ್ತು ಲೀಲಾ ಪರಸ್ಪರರ ಜೀವನವನ್ನು ಅರ್ಥಮಾಡಿಕೊಳ್ಳುವ ಅವಕಾಶ ಪಡೆಯುತ್ತಾರೆ. ನಗೆ, ಸಂಘರ್ಷ, ಭಾವನಾತ್ಮಕ ಕ್ಷಣಗಳ ಮೂಲಕ ಸಾಗುವ ಕಥೆ ಕೊನೆಗೆ ಜೀವನದ ಮಹತ್ವದ ಪಾಠಗಳನ್ನು ತಿಳಿಸುತ್ತದೆ. ಇತರರಿಗೆ ಸಲಹೆ ನೀಡುವುದು ಸುಲಭವಾದರೂ, ತಮ್ಮೊಳಗಿನ ದೋಷಗಳನ್ನು ಎದುರಿಸುವುದು ನಿಜವಾದ ಧೈರ್ಯ ಎಂಬ ಸಂದೇಶವನ್ನು ಚಿತ್ರ ನೀಡುತ್ತದೆ.

ತಾರಾಗಣ:
ತುಳು ಚಿತ್ರರಂಗದ ಜನಪ್ರಿಯ ಕಲಾವಿದರಾದ
ಡಾ. ದೇವದಾಸ್ ಕಾಪಿಕಾಡ್,
ನವೀನ್ ಡಿ ಪಡೀಲ್,
ಅರವಿಂದ್ ಬೋಳಾರ್,
ಎಲ್ಟನ್ ಜೆಫ್,
ಅದ್ವಿತಿ ಶೆಟ್ಟಿ,
ಅನುಪ್ ಸಾಗರ್ ಹಾಗೂ
ಅನುಷಾ ರಾಜ್
ಮುಖ್ಯ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.

ನಿರ್ದೇಶನ:
ಚಿತ್ರಕ್ಕೆ ತೇಜೇಶ್ ಪೂಜಾರಿ ನಿರ್ದೇಶನ ನೀಡಿದ್ದಾರೆ. ಭಾರತೀಯ ಮನರಂಜನಾ ಕ್ಷೇತ್ರದಲ್ಲಿ ೨೫ ವರ್ಷಕ್ಕೂ ಹೆಚ್ಚು ಅನುಭವ ಹೊಂದಿರುವ ಅವರು ಬಾಲಿವುಡ್‌ನಲ್ಲಿ ಖ್ಯಾತ ನೃತ್ಯ ನಿರ್ದೇಶಕ ಗಣೇಶ್ ಹೆಗ್ಡೆ ಅವರೊಂದಿಗೆ ಕೆಲಸ ಮಾಡಿದ್ದು, ಶಾರುಖ್ ಖಾನ್, ಅಮಿತಾಭ್ ಬಚ್ಚನ್, ರಣಬೀರ್ ಕಪೂರ್, ರಣವೀರ್ ಸಿಂಗ್ ಸೇರಿದಂತೆ ಹಲವು ಪ್ರಮುಖ ನಟರೊಂದಿಗೆ ಕೆಲಸ ಮಾಡಿದ ಅನುಭವ ಹೊಂದಿದ್ದಾರೆ.

ತಮ್ಮ ಮೊದಲ ನಿರ್ದೇಶನದ “ತುಡರ್” ಚಿತ್ರದ ಯಶಸ್ಸಿನ ಬಳಿಕ ತೇಜೇಶ್ ಪೂಜಾರಿ ಅವರು ಇದೀಗ ‘ದೇವ್ ದಾಸ್ ನ ಲೀಲಾ’ ಮೂಲಕ ಕರಾವಳಿ ಚಿತ್ರರಂಗಕ್ಕೆ ಹೊಸ ದೃಷ್ಟಿಕೋನ ನೀಡಿದ್ದಾರೆ.

ನಿರ್ಮಾಣ:
ಚಿತ್ರವನ್ನು ತೇಜೇಶ್ ಪೂಜಾರಿ ಹಾಗೂ ದೀಪಕ್ ಸಿಂಗ್ ನಿರ್ಮಿಸಿದ್ದಾರೆ. ಬಾಲಿವುಡ್‌ನಲ್ಲಿ ನೃತ್ಯ ನಿರ್ದೇಶಕರು ಹಾಗೂ ಸೃಜನಾತ್ಮಕ ಕ್ಷೇತ್ರದಲ್ಲಿ ಅನುಭವ ಹೊಂದಿರುವ ಈ ಜೋಡಿ ತುಳು ಚಿತ್ರರಂಗದ ಬೆಳವಣಿಗೆಯ ಸಾಧ್ಯತೆಗಳನ್ನು ಗುರುತಿಸಿ ಈ ಚಿತ್ರ ನಿರ್ಮಾಣ ಮಾಡಿದ್ದಾರೆ.

ದೀಪಕ್ ಸಿಂಗ್ ಅವರು ಜಲಕ್ ದಿಖ್ಲಾ ಜಾ ಸೀಸನ್-೨ನಲ್ಲಿ ಪ್ರಾಚಿ ದೇಸಾಯಿ ಅವರೊಂದಿಗೆ ವಿಜೇತರಾಗಿ ಗುರುತಿಸಿಕೊಂಡಿದ್ದು, ಹಲವು ಸಿನಿಮಾ ಹಾಗೂ ಕಿರುತೆರೆ ತಾರೆಯರೊಂದಿಗೆ ಕೆಲಸ ಮಾಡಿದ್ದಾರೆ.

ಸಂಗೀತ:
ಚಿತ್ರದ ಹಾಡುಗಳಿಗೆ ಖ್ಯಾತ ಬಾಲಿವುಡ್ ಹಿನ್ನೆಲೆ ಗಾಯಕರು ಶಾನ್, ದಿವ್ಯ ಕುಮಾರ್ ಹಾಗೂ ಶೆಹ್ಜಾದ್ ಅಲಿ ಧ್ವನಿ ನೀಡಿದ್ದಾರೆ.

ವಿಶೇಷ ಆಕರ್ಷಣೆ:
ಚಿತ್ರದ ಪ್ರಚಾರದ ಟೈಟಲ್ ಟ್ರ್ಯಾಕ್‌ನಲ್ಲಿ ಖ್ಯಾತ ನೃತ್ಯ ನಿರ್ದೇಶಕರಾದ ರೆಮೋ ಡಿಸೋಜಾ, ಗೀತಾ ಕಪೂರ್ ಹಾಗೂ ಟೆರೆನ್ಸ್ ಲೂಯಿಸ್ ವಿಶೇಷವಾಗಿ ಕಾಣಿಸಿಕೊಂಡಿದ್ದಾರೆ.

‘ದೇವ್ ದಾಸ್ ನ ಲೀಲಾ’ ನಗುವಿನ ಜೊತೆಗೆ ಭಾವನೆ, ಜವಾಬ್ದಾರಿ, ಸಹಾನುಭೂತಿ ಮತ್ತು ಜೀವನದ ಒಳನೋಟಗಳನ್ನು ಸಾರುವ ಮನಮುಟ್ಟುವ ಚಿತ್ರವಾಗಿದ್ದು, ತುಳು ಸಿನಿ ಪ್ರೇಕ್ಷಕರಿಗೆ ವಿಭಿನ್ನ ಅನುಭವ ನೀಡುವ ಪ್ರಯತ್ನವಾಗಿದೆ.

ಗುರುವಾರ ಸಂಜೆ 7 ಗಂಟೆಗೆ DRC ಚಿತ್ರಮಂದಿರದಲ್ಲಿ “Dev Das Na Leela” ಚಿತ್ರದ ಪ್ರದರ್ಶನ ಇದೆ.